İKT

Tarix:31/10/14

Londonda “ICANN”-ın 50-ci konfransı keçirilir

Londonda “ICANN”-ın (İnternetdə domen adların və ünvanlarının qeydiyyatçısı) 50-ci konfransı öz işinə başlayıb. Tədbirə 3 300 insanın qatılması konfransı təşkilatın tarixində ən irimiqyaslı tədbirə çevirib.

“ICTnews” xəbər xidmətinin “ICANN”–ın rəsmi internet səhifəsinə istinadən verdiyi məlumata əsasən, tədbirdə “ICANN”-ın prezidenti və baş direktoru Fadi Şehadi konfransın internetin idarəetməsində vacib bir hadisə olduğunu qeyd edib.

O, Çin hakimiyyətinin DNSSEC-in və “IPv6” protokolunun geniş tətbiqi ilə bağlı qərarlarını alqışlayıb və bunun internetin qlobal artımının genişlənməsinə kömək edəcəyini bildirib. Çinin kiberməkan üzrə naziri Lu Uey öz növbəsində bildirib ki, bütün ölkələrin vahid məqsədi internetin idarəetməsinin yaxşılaşdırılmasıdır. Onun sözlərinə görə, bu da “Bir dünya bir internet” konsepsiyasına uyğun gəlir.

Tədbirdə çıxış edənlər internetin idarəetməsində inklüziv modelə sadiq olduqlarını bildirərək internetin əhəmiyyətli iqtisadi artım və intellektual azadlıq üçün şərait yaratdığını, eləcə də, gələcəkdə bu uğurlu prinsiplərin qorunub saxlanılmasının vacibliyini qeyd ediblər.

Qeyd edək ki, “ICANN”-ın 50-ci konfransı bir həftə davam edəcək. Tədbir çərçivəsində “ICANN”-ın qlobal hesabatlılığı ilə bağlı görüşlər keçiriləcək və ABŞ hökumətinin maraqlı tərəflərin iştirakı ilə internet modelinin texniki funksiyalarının yerinə yetirilməsində əlaqələndirmə rolunun ötürülməsi ilə bağlı təkliflərə baxılacaq.

Aynur Vəliyeva

Baxış sayı: 715