NRYTN

Tarix:14/11/14

Gənc Mühəndislər “Azərkosmos” ASC-də olublar

“Gənc Mühəndislərin İnkişafı” İctimai Birliyinin bir qrup mühəndislik peşəsinin ayrı-ayrı ixtisaslarında təhsil alan üzvləri, eləcə də əmək fəaliyyəti ilə məşğul olan gənc mühəndislər “Azərkosmos” ASC-nin Əsas Yerüstü Peyk İdarəetmə Mərkəzinə (ƏYPİM) səfər ediblər.

13 noyabr 2014-cü ildə baş tutan səfərdə onlara “Azərkosmos”un fəaliyyəti, “Azerspace-1” telekommunikasiya peykinin istehsalı prosesi, əhatə zonası, göstərdiyi xidmətlər və iş prinsipi, ƏYPİM-dəki yerüstü sistemlərlə bağlı geniş məlumat verilib.

Peykin idarə olunması və stansiyada müxtəlif hava şəraitində görülən tədbirlər barədə məlumatlar iştirakçıların böyük marağına səbəb olub.

Səfərin sonunda “Gənc Mühəndislərin İnkişafı” İctimai Birliyinin üzvlərinə “Azərkosmos” ASC adından hədiyyələr təqdim olunub və iştirakçılarla birgə xatirə şəkli çəkilib.

Qeyd edək ki, Qafqazda yeganə peyk operatoru olan “Azərkosmos” ASC rəqəmli yayım, VSAT şəbəkələri və digər telekommunikasiya xidmətlərinin göstərilməsi üçün peyk tutumları təqdim edir.

2013-cü ilin fevral ayında orbitə buraxılan və “Azərkosmos” tərəfindən idarə edilən “Azərspace-1” peyki 46° Şərq uzunluğu orbital mövqeyində yerləşir və Avropa, Afrika, Yaxın Şərq, Qafqaz və Mərkəzi Asiya regionlarını əhatə edir.

Baxış sayı: 1861