İKT

Tarix:12/12/14

Müasir texnologiyaların tətbiqinə əsaslanan investisiya layihələrinin qəbulu davam edir

Azərbaycanda İxracın və İnvestisiyaların Təşviqi Fondu (AZPROMO) 2015-ci il üçün xarici investorlara və tərəfdaşlara təqdim edilməsi məqsədilə sahibkarlıq subyektlərindən investisiya layihələrinin qəbulunu davam etdirir. Şərtlərə görə, layihələr qeyri-neft sektorunun sahələrini əhatə etməli, maliyyə baxımından əsaslandırılmış və iqtisadi cəhətdən səmərəli olmalıdır.

Eyni zamanda investisiya layihələri beynəlxalq standartlara cavab verən müəssisələrin yaradılmasını və ya müəssisələrin müasir texnologiyaların tətbiqi ilə yenidən qurulmasını, əsasən ixracyönümlü və idxaləvəzləyici, yüksək keyfiyyətli, rəqabətə davamlı məhsulların istehsalını nəzərdə tutmalıdır.

İnvestisiya təklifləri AZPROMO tərəfindən xarici investorlara və tərəfdaşlara təqdim ediləcək. Fonddan qeyd edilib ki, investisiya layihələri bir sıra məlumatları özündə əks etdirməlidir. Buraya layihənin adı və həyata keçiriləcəyi yer; layihənin məqsədi və təsviri; dəyəri və təklif olunan maliyyələşdirmə sxemi və ya pay bölgüsü; həyata keçirilmə və özünü ödəmə müddəti; layihəni həyata keçirən şirkət/benefisiar barədə məlumat (şirkətin adı, ünvanı, əlaqəli şəxsin adı, vəzifəsi və əlaqə vasitələri (mobil telefon və elektron poçt) daxildir.

İnvestisiya layihələrinin qısa təsviri xüsusi formada təqdim edilməli və hər bir layihə biznes plan və ya texniki iqtisadi əsaslandırma ilə müşayiət olunmalıdır.

Layihə üçün formanı AZPROMO-dan əldə etmək olar. Sahibkarlıq subyektləri investisiya təkliflərini fonda elektron daşıyıcılarında və ya çap şəklində təqdim edə bilərlər.

Həqiqət İSABALAYEVA

Baxış sayı: 565