İKT

Tarix:26/01/15

“Bakı 2015” Avropa Oyunlarına ilk biletlər “Bakı 2015”-in rəsmi veb səhifəsi vasitəsilə satışa çıxarılacaq

“Bakı 2015” Avropa Oyunlarına bilet satışı yazın əvvəlində başlanacaq. Bu məqsədlə bir neçə rəsmi bilet satışı kanalları təqdim ediləcək. Oyunlara ilk biletlər isə mart ayında “Bakı 2015”-in rəsmi veb səhifəsi vasitəsilə (birincilik prinsipinə əsasən) satışa çıxarılacaq. Təşkilat Komitəsindən bildirilib ki, şəhər bilet satışı məntəqələri 2015-ci ilin aprel ayında açılacaq: “Oyunlar zamanı yarış məkanında da bilet satışı məntəqələri olacaq.

Ümumiyyətlə, hər bir kəs istənilən yerdə oyunlar üçün rəsmi bilet satışı kanalları ilə təmin olunacaq. Məsələn, xaricdə yaşayanlar biletləri onlayn olaraq “bakı2015.com/tickets” rəsmi bilet satışı veb səhifəmizdən əldə edə biləcəklər”.

Eyni zamanda “Bakı 2015” bərabərlik prinsipini dəstəkləyir və əlillərin də biletlə təminatında heç bir ayrı-seçkiliyə yol vermir. Bilet alışı zamanı əlillik ilə əlaqədar xüsusi ehtiyaclarını bildirən tamaşaçılar olarsa, onlar xüsusi oturacaqlarla və ya əlil arabası üçün yerlə təmin ediləcəklər:

“Xüsusi ehtiyaclarını bildirən tamaşaçılar pulsuz biletin sifarişi, əldə edilməsi zamanı və yarış obyektinə daxil olarkən xüsusi tibbi şəhadətnamə təqdim etməlidirlər. Pulsuz biletlə əlilliyi təsdiq edən sənəd təqdim edilmədiyində, həmin şəxsin sahəyə girişinə icazə verilməyərək uyğun bilet əldə etmək üçün bilet satışı məntəqəsinə istiqamətləndiriləcək”.

Qeyd edək ki, “Bakı 2015” Avropa Oyunları ilə bağlı 280-dən çox yarış sessiyası üçün ictimaiyyətə təxminən bir milyon bilet satışı nəzərdə tutulur. Biletlərin qiymət dərəcələri cari ilin əvvəlində ictimaiyyətə bilet satışı proqramı nümayiş etdirildikdən sonra açıqlanacaq. Əsas məqsəd oyunlara mümkün qədər çox sayda insanın iştirakını təmin etmək üçün biletləri əlverişli qiymətdə təqdim etməkdir.

Həqiqət İSABALAYEVA

Baxış sayı: 867