İKT

Tarix:13/07/15

Elektron hökumətin təbliği genişləndirilib

Azərbaycanda digər peşə sahibləri ilə yanaşı, fermerlər arasında da informasiya-kommunikasiya texnologiyalarından, eləcə də elektron xidmətlərdən istifadə ilə bağlı maarifləndirmə tədbirləri həyata keçirilir.

Kənd Təsərrüfatı Nazirliyindən verilən məlumata görə, ölkədə elan olunan “Kənd Təsərrüfatı İli” çərçivəsində zona müşavirələri keçirilir, fermerlərlə görüşlər təşkil edilir. Hər bir tədbirdə ölkədə qurulan elektron hökumət, elektron xidmətlər və eləcə də informasiya bazaları barəsində ətraflı məlumat verməklə yanaşı, Kənd Təsərrüfatı Nazirliyi tərəfindən əhaliyə təqdim olunan e-xidmətlərdən istifadə qaydaları istiqamətində fikirlər bildirilir.

KTN-dən verilən məlumata görə, əhali ilə baş tutan bütün görüşlərdə elektron xidmətlərin faydaları, istifadəçiyə verdiyi üstünlüklər izah olunmaqla yanaşı, əlavə xərclərin azaldılmasında, vaxt itkisinin qarşısının alınmasında, bürokratiyanın, süründürməçiliyin aradan tam qaldırılmasında elektron hökumətin əhəmiyyətindən danışılıb.

Bununla yanaşı, kənd təsərrüfatı istehsalında tətbiq olunan yeni texnologiyalar izah edilməklə texnoloji avadanlıqların tətbiqinin genişləndirilməsi, əhalinin bu istiqamətdə olan bilik və bacarıqlarının artırılmasına da böyük diqqət yetirilir.

KTN-dən bildirilib ki, cari ildə ölkədə aparılan aqrar siyasətin bölgələrdə geniş təbliğ edilməsi, bitkiçilik məhsullarının becərmə texnologiyalarına əməl olunması, istehsalın artırılması, itkilərin qarşısının alınması, məhsulun keyfiyyətinin yüksəldilməsi üzrə regionlarda texniki, texnoloji, təşkilati və digər tədbirlərin həyata keçirilməsi xüsusi əhəmiyyət kəsb edir.

SEYMUR

Baxış sayı: 518