Tarix:14/08/15

Naxçıvanda nağdsız ödənişlərin həcmi 4 dəfə artıb

Naxçıvan Muxtar Respublikasında nağdsız ödənişlərin həcmi bu ilin əvvəlindən yetərincə artıb.

“ICTnews” xəbər xidmətinin məlumatına əsasən, Azərbaycan Mərkəzi Bankının Naxçıvan Muxtar Respublikası İdarəsi bildirib ki, nağdsız dövriyyə avqustun 1-nə olan məlumata əsasən ötən ilin əvvəli ilə müqayisədə 4 dəfə artaraq 1 milyon 194 min 40 manat təşkil edib. Bu məbləğin 863 min 57 manatı POS-terminallar, 330 min 983 manatı isə internet və digər ödəniş vasitələri ilə aparılıb.
 
Muxtar respublikada ödəniş kartlarının sayı avqustun 1-nə olan məlumata əsasən 214 min 108 ədəd təşkil edib, bu isə əhalinin hər iki nəfərindən birinin ödəniş kartı ilə təmin edilməsi deməkdir. Son bir ildə bu göstərici 18 min 797 ədədə bərabər olub. Naxçıvanda son bir ildə POS-terminalların sayı 333 ədəd artıb və 1012 ədəd təşkil edib, bankomatların sayı isə 95 ədəddir.
 
Əhalinin nağdsız əməliyyatları daha rahat həyata keçirməsi üçün Naxçıvan şəhərində 2 yeni “MilliÖn” terminalı quraşdırılıb.

Ümumilikdə, bu ilin əvvəlindən muxtar respublika sakinləri tərəfindən aparılmış nağdsız əməliyyatların həcmi 9 milyon 324 min 601 manat təşkil edib, bu da ötən ilin müvafiq dövrü ilə müqayisədə 4 milyon 715 min manat çoxdur.
 
Aynur Vəliyeva
 

Baxış sayı: 668

© İstifadə edilərkən İctnews-a istinad olunmalıdır