İKT

Tarix:02/11/15

Mobil aksessuar satışından əldə olunan qlobal gəlir ildə orta hesabla 4,3 faiz artacaq

«ABI Research» analitik şirkətinin proqnozuna görə, 2015-ci ildə dünya mobil aksessuar bazarında gəlirin həcmi 81,5 milyard ABŞ dolları təşkil edəcək və 2020-ci ildə 101 milyard dollara yaxınlaşacaq. Beləliklə, 2015-2020-ci illərdə orta illik artım 4,3 faiz təşkil etməlidir.

«ICTnews.az» saytı «dailycomm.ru» saytına istinadən yazır ki, sözügedən bazarda qoruyucu futlyarlar ən populyar kateqoriya olacaq: mobil cihazlar üçün aksessuar bazarına tədarükün çox hissəsi bu kateqoriyanın payına düşəcək. Enerjidoldurma qurğuları ikinci pilləni tutacaq, ekranlar üçün qoruyucu plyonkalar və qulaqcıqlar növbəti pillələrdə qərarlaşacaq.

"Smartfonlar o qədər incə və yüngüldür ki, çexollar sadəcə lazımdır. Bundan başqa, futlyarlara tələbatın artımı simsiz enerjidoldurma və mobil ödənişlər imkanı kimi funksiyaların yaradılmasını stimullaşdırır" - «ABI Research»in analitiki Marina Lyu deyib.

Qulaqcıqlar gəlir baxımından ən sürətli artan kateqoriya olacaq və yaxın 5 ildə bu tip qurğuların tədarük həcmi ildə orta hesabla 5,7 faiz artacaq. «Bluetooth» qulaqcıqların payı artır, hərçənd naqilli qulaqcıqlara tələbat, həmçinin sabit yüksək olaraq qalır.

Emil Hüseynov

Baxış sayı: 477