İKT

Tarix:07/11/15

İnformasiya Texnologiyalarının İnkişafı Dövlət Fondu ilin sonuna kimi 100-ə qədər layihə maliyyələşdirəcək

Azərbaycan Rabitə və Yüksək Texnologiyalar Nazirliyi tabeliyində İnformasiya Texnologiyalarının İnkişafı Dövlət Fondu İT layihələrin maliyyələşdirilməsini genişləndirir.

"ICTnews" xəbər xidmətinin məlumatına əsasən, Fondun rəhbəri Elçin Zeynalov bildirib ki, bu ilin sonuna kimi Fond tərəfindən artıq 100-ə qədər layihə maliyyələşdiriləcək.

"Bu gün Fondun maliyyələşdirdiyi startap layihələri xarici ölkələrdə sərmayələr cəlb edə biliblər və artıq kommersiyalaşma istiqamətində addımlayırlar. Uğurlu layihələr olsa da, əksər layihələr kiçik miqyaslıdır. Biz istəyirik ki, startapçılar dövlət tərəfindən təqdim edilən maliyyə dəstəyi əvəzində daha da maraqlı, önəmli layihələr təqdim etsinlər",- deyə E. Zeynalov bildirib.

Xatırladaq ki, Fondun Müşahidə Şurası tərəfindən 2-ci qrant müsabiqəsi çərçivəsində 129 layihə qəbul olunmuşdur. İlkin və kompleks ekspertizadan 62 layihə keçib. Müşahidə Şurası tərəfindən 30 layihənin maliyyələşdirilməsi ilə bağlı qərar qəbul edilib. Hazırda isə artıq üçüncü qrant müsabiqəsi elan edilib və bu ayın 10-dək müsabiqə çərçivəsində layihələrin qəbulu başa çatacaq.

Aynur Vəliyeva

Baxış sayı: 776