İKT

Tarix:21/11/15

“SpaceX” şirkəti və ABŞ hökuməti arasında “Dragon” gəmisinin Beynəlxalq Kosmik Stansiyaya uçuşuna dair saziş imzalanıb

“SpaceX” şirkəti və ABŞ hökuməti arasında pilotlu “Dragon” kosmik gəmisindən astronavtların Beynəlxalq Kosmik Stansiyaya çatdırılması üçün istifadəsinə dair ilk saziş imzalanıb. ABŞ Kosmik Agentliyinin (NASA) məlumatına görə, bu ilin mayında analoji saziş orbital kompleksə uçuşlar üçün "CST-100 Starliner” gəmisini yaradan "Boeing” aviaşirkəti ilə imzalanıb.

“SpaceX” və “Boeing” şirkətləri “NASA”-nın yeni pilotlu gəmilərin yaradılması üçün elan etdiyi müsabiqənin qalibləri olub və məhz buna görə hazırda layihələr üçün büdcədən böyük məbləğdə maliyyələşmə alırlar. ABŞ Kosmik Agentliyinin “SpaceX” şirkətinə üç il ərzində 2,6 milyard dollar, “Boeing” aviaşirkətinə 4,2 milyard dollar ayırması nəzərdə tutulur. Sazişə görə, şirkətlər layihələri 2017-ci ilin sonunadək başa çatdıraraq bir il sonra ekipajların stansiyaya çatdırılması ilə məşğul olmağa başlamalıdırlar.

Məlumat üçün qeyd edək ki, “Dragon” “SpaceX” şirkətinin “NASA”-nın sifarişi ilə faydalı yükün, perspektivdə isə insanların Beynəlxalq Kosmik Stansiyaya çatdırılması və geri qaytarılması üçün nəzərdə tutulan “Commercial Orbital Transportation Services” (COTS) proqramı çərçivəsində hazırlanan özəl nəqliyyat kosmik gəmisidir, - “TASS ” yazır.

Baxış sayı: 481