İNTERNET

Tarix:26/11/15

«Microsoft» «Internet Explorer»in köhnə versiyalarına dəstəyin dayandırılması tarixini açıqladı

«Microsoft» korporasiyası «Internet Explorer» brauzerinin köhnə versiyalarının dəstəyinin dayandırılacağı tarixi açıqlayıb. 12 yanvar 2016-cı il tarixindən başlayaraq yalnız brauzerin son versiyasına təhlükəsizlik və səhvlərin düzəlişi ilə əlaqədar yeniləmələr yükləniləcək.

«ICTnews.az» Elektron Xəbər Xidməti «dailycomm.ru» saytına istinadən yazır ki, ABŞ şirkəti «Internet Explorer 11» brauzerini yalnız «Windows 7», «8», «8.1» və «10» əməliyyat sistemlərində dəstəkləmək niyyətindədir. Şirkətin nümayəndəsi istifadəçilərə öz brauzerin aktual versiyasından istifadəni tövsiyə ediblər, çünki texniki dəstəyin dayandırılması təhlükəsizliklə bağlı problemlər yarada bilər.

Qeyd edək ki, «Microsoft» korporasiyası «Windows 10» əməliyyat sistemində «Internet Explorer»i əsas brauzer kimi istifadə etməkdən imtina edib. İndi «Microsoft Edge» proqramı bu statusa malikdir.

«StatCounter» şirkətinin 2015-ci ilin oktyabrına olan statistikasına əsasən, qlobal brauzerlər bazarında «Internet Explorer»in bazar payı 15,38 faiz təşkil edir, «Google» internet şirkətinin «Chrome» brauzerinin göstəricisi 53,62 faizdir.

Emil Hüseynov

Baxış sayı: 710