İKT

Tarix:06/06/16

İnformasiya Texnologiyalarının İnkişafı Fondunun maliyyə dəstəyilə “Robi Guide” adlı layihəyə start verilir

Rabitə və Yüksək Texnologiyalar Nazirliyinin tabeliyində İnformasiya Texnologiyalarının İnkişafı Dövlət Fondunun maliyyə dəstəyilə Azərbaycanın turizm sektorunda "Robi Guide - elektron bələdçi" adlı maraqlı layihəyə start verilir.

Belə ki, ölkəyə gələn turistlərin artıq bələdçiyə pul ödəməsinə ehtiyac yoxdur. Turist (və ya yerli əhali) proqramı mobil telefona yükləyərək şəhərə çıxdığı zaman istəyindən asılı olaraq özü axtarıb filtrləyib istiqamət seçə bilər.

"Robie Guide" daxili, eləcə də qlobal bazarda turizm sahəsində yeni tendensiyaları özündə ehtiva edir.

"Robie Guide" bütün Bakını və daha sonra bütün Azərbaycanı əhatə edəcək. Bütün tarixi abidələr, binalar, restoranlar, əyləncə mərkəzləri, ofislər və s. barədə ətraflı məlumatı səsli (audio) və yazılı şəkildə Azərbaycan, rus və ingilis dillərində istifadəçiyə təqdim edəcək.

Bundan əlavə, istifadəçilər xüsusi proqram vasitəsilə ətrafda olan əyləncə və istirahət mərkəzləri, otellər, ofislər, tarixi abidələr, restoranlar, menyular, onların qiymətləri və s. barəsində məlumatlar da əldə edəcəklər.

Layihə çərçivəsində ilk olaraq, "Android" əməliyyat sistemi istifadəçiləri üçün mobil tətbiq (http://robiguide.com) hazırlanıb.

Daha sonra "iOS" və "Windows Phone" istifadəçiləri üçün də xüsusi proqramların yazılması nəzərdə tutulub. Proqram "Microsoft" sistemi üzərində, "Google Map" və e-gov API-ləri üzərindən də istifadə ediləcək.

Layihənin rəhbəri Namət Məmmədzadədir.

Layihənin gələcəkdə xarici ölkələrdə də icrası planlaşdırılır. Artıq bununla bağlı Türkiyə, Gürcüstan və Qazaxıstanla danışıqlar aparılır.

Baxış sayı: 1123