NRYTN

Tarix:29/10/11

Qarabağın cənub ərazilərində yüksək keyfiyyətli yayım təmin olunur

Füzuli rayonunun Əhmədbəyli kəndində yerləşən telestansiyada rəqəmli yayım avadanlıqlarının qurulub başa çatdırılması nəticəsində Qarabağın cənub ərazilərində yerləşən rayonlarda yüksək keyfiyyətli yayım təmin etmiş oluruq. Bu barədə “ictnews”-a “Teleradio” İB-nin texniki direktoru Mikayıl Abbasov bildirib.

Onun sözlərinə görə, bundan əvvəl Ağsu qülləsində vericinin qurulması nəticəsində bölgədə rəqəmli yayım təmin olunmuşdursa, Əhmədbəyli stansiyasında uyğun tədbirlərin həyata keçirilməsi yayımın daha mükəmməl olmasına şərait yaradacaq. “Əhmədbəyli stansiyasından yayımın təmin edilməsi çox böyük arealda rəqəmli yayımla əhatə olunması deməkdir”- deyə M.Abbasov bildirib.

Texniki direktor ilin sonunadək bütün Azərbaycan ərazisinin rəqəmli televiziyanın əhatə dairəsinə qatılacağını qeyd edərək hazırda yayımın Bakı və Abşeron yarımadası ilə yanaşı, Gəncə, Şirvan, Lerik, Ağsu stansiyaları vasitəsilə adıçəkilən şəhər və rayonlarla yanaşı, ətraf rayonları da əhatə etdiyini xatırladıb.

Qeyd edək ki, ölkədə analoq efir yayımından rəqəmsal yayıma keçid 2009-cu ildən, Bakıda isə bu istiqamətdə sınaq işlərinə 2004-cü ildən başlanılıb.

Baxış sayı: 1301