12px13px15px17px
Tarix:28/01/12

RİTN-də fərdi məlumatların mühafizəsi müzakirə olunub

Rabitə və İnformasiya Texnologiyaları Nazirliyində (RİTN) Məlumatların Mühafizəsi Gününə həsr olunan tədbir keçirilib.

28 yanvar 1981-ci ildə Avropa Şurası tərəfindən "Fərdi məlumatların avtomatlaşdırılmış qaydada işləməsi ilə əlaqədar şəxslərin qorunması haqqında" Konvensiya qəbul edilib və son illər ərzində Avropa ölkələrində bu tarix fərdi məlumatların mühafizəsi mövzusuna həsr edilir. Azərbaycanda bu gün artıq ikinci dəfədir qeyd edilir.

Tədbirdə dövlət orqanlarının nümayəndələri, özəl şirkətlərin, operator və internet-provayderlərin rəhbərləri iştirak ediblər. Rabitə və informasiya texnologiyaları nazirinin müavini Elmir Vəlizadə çıxışında bildirib ki, fərdi məlumatın saxlanılması informasiya texnologiyalarının inkişafı əsrində daha çox ön plana çıxır və vətəndaşları narahat edir.

Nazir müavini son vaxtlar dünyada fərdi məlumatların sızması hallarının çoxalmasını təəssüf hissi ilə qeyd edərək qeyd edib ki, bugünkü tədbir şəxsi informasiyanın mühafizəsinin aktual məsələlərinin bir daha müzakirəsinə yönəlib.

Tədbir iştirakçılarına məlumatların mühafizəsi üsullarına həsr edilən videoçarx nümayiş olunub. Sonra bu sahədə Azərbaycanda həyata keçirilən işlər haqqında məruzə oxunub. Xüsusilə respublikada fərdi məlumatların mühafizəsi üzrə qəbul edilən hüquqi baza, informasiya sistemlərində məlumatların toplanması, emalı və saxlanılması məsələləri barədə məlumat verilib. Daha sonra tədbirdə müzakirələr aparılaraq həm dövlət, həm də özəl təşkilatların məlumatlarının saxlanılmasının mühafizəsi sisteminin yaxşılaşdırılmasının, fərdi məlumatlara diqqətlə yanaşmanın və onun sızmasının qarşısının alınmasının, eləcə də bu sahədə qarşılıqlı əməkdaşlığın zəruriliyi haqqında fikirlər səsləndirilib.


Yekunda iştirakçılar gələcəkdə belə tədbirlərin daha geniş formatda keçirilməsinin labüdlüyünü vurğulayıblar, belə ki, bu, həm vətəndaşların fərdi məlumatların mühafizəsi sahəsində malik olduqları hüquqlar barədə məlumatlandırılması, həm də bu istiqamətdə yaranan məsələlərin öyrənilməsi və birgə müzakirəsi üçün yaxşı imkanlar açacaq.



Baxış sayı: 752

© İstifadə edilərkən İctnews-a istinad olunmalıdır

Facebook Google Favorites.Live BobrDobr Delicious Twitter Propeller Diigo Yahoo Memori MoeMesto






29 Mart 2024

28 03 2024