TƏHLÜKƏSİZLİK

Tarix:11/04/12

Poçt spamının həcmi azalmağa davam edir

"Entensys" və "CommTouch" analitik şirkətləri internetdə spam mesajların yayılmasının həcmi haqqında yeni hesabat təqdim ediblər. Hesabata əsasən, 2012-ci ilin birinci rübündə spamın həcmi sürətli templə azalmağa davam edib; azalmanın orta hesabla təxminən 40% təşkil etdiyi bildirilib, hərçənd ki spamın günlük orta göstəricisi hələ də yüksəkdir. Belə ki, gün ərzində qlobal şəbəkədə 94 milyard spam mesaj və fişinq istinadları yayılır.

Məlumat üçün bildirim ki, fişinq (ing. phishing − balıq ovu, balıq tutma) − kiberdələduzluğun xüsusi növüdür, istifadəçiləri aldatma yolu ilə adətən maliyyə xarakterli fərdi məlumatları təqdim etməyə məcbur etməyə yönəlir.

Dələduz bank saytı kimi görünən (və ya maliyyə əməliyyatları aparılan istənilən digər sayt kimi, məsələn, eBay) saxta veb-sayt yaradır. Sonra kibercinayətkarlar istifadəçiləri bu sayta aldadıb aparmağa cəhd edirlər ki, bu saytda onlar login, parol və ya PİN-kod kimi konfidensial məlumatları daxil etsinlər. Çox zaman dələduzlar bunun üçün həmin saytlara istinadları spamın köməyi ilə yayırlar.

"İCTnews.az" elektron xəbər xidməti "pitbut.ru" saytına istinadən bildirir ki, spam göndərən ölkələrin reytinqində Hindistan lider olaraq qalır, ikinci yerdə Rusiya, üçüncü yerdə isə Braziliya qərarlaşıb.

EMİL

Baxış sayı: 1460