TƏHLÜKƏSİZLİK

Tarix:17/08/13

İnformasiya təhlükəsizliyi üzrə beynəlxalq tədbir keçiriləcək

Regional Rabitə Birliyinin (RRB) elektrorabitə üzrə komissiyasının, Regional Rabitə Birliyinin elektrorabitə operatorları şurasının 32/28-ci birgə iclası və qarşılıqlı fəaliyyətdə olan rabitə şəbəkələrinin informasiya təhlükəsizliyi üzrə İşçi qrupunun 19-cu iclası sentyabrın 12-13-də Voronej şəhərində keçiriləcək.

“ICTnews” xəbər xidmətinin RRB-nin rəsmi saytına istinadən verdiyi məlumata əsasən, birgə iclasda MDB ölkələrində beynəlxalq rabitə xidmətləri göstərildikdə (o cümlədən rouminqdə) operatorlar arası hesablaşmaların həyata keçirilməsi prinsipləri haqda sazişin layihəsinin baxılması nəzərdə tutulub.

Tədbirdə eyni zamanda, radiotezlik çeşidinin idarəedilməsinin iqtisadi metodlarının istifadəsi, 2012-ci il ərzində MDB ölkələrinin infokommunikasiya inkişafının regional monitorinqinin nəticələri, aşağı əhali sıxlaşması müşahidə olunan ərazilərdə rəqəmsal qeyri-bərabərliyin aradan qaldırılması üçün yeni imkanlar müzakirə ediləcək.
İclaslarda rabitə şəbəkələrində xidmət keyfiyyətinin və rabitə sistemlərinin monitorinq mərkəzlərinin tətbiqi məsələləri, RRB-yə üzv olan ölkələrin şəbəkələrinin konvergensiyasını nəzərə alaraq rabitə şəbəkələrinin qarşılıqlı fəaliyyətinin İP protokola keçirilməsi, mobil və stasionar rabitə şəbəkələrində nömrələrin daşınması sisteminin tətbiqi məsələlərinə də baxılacaq.

Qeyd edək ki, Azərbaycan tərəfini informasiya təhlükəsizliyi komissiyasında Məlumat-Hesablama Mərkəzinin rəhbəri Nail Mərdanov təmsil edir.

Aynur Vəliyeva

Baxış sayı: 746