12px13px15px17px
Tarix:07/02/14

Elektron Təhlükəsizlik Mərkəzi uşaqların internet təhlükəsizliyini təmin etməyə çalışır

Rabitə və İnformasiya Texnologiyaları Nazirliyinin (RİTN) Elektron Təhlükəsizlik Mərkəzi (ETM) uşaqların internet təhlükəsizliyinin təmin olunması sahəsinə xüsusi diqqət göstərir.
 
Mərkəzin bu mövzuya dair açıqlamasında qeyd olunur ki, uşaqların internet təhlükəsizliyinin təmin olunması üçün valideynlər qədər uşaqlar özləri də məsuliyyət daşıyır. Sürətli və sərhədsiz əlçatanlıq sayəsində həyatı əhəmiyyətli dərəcədə asanlaşdıran internet, uşaqlar üçün həm əyləncə, həm də tədris vasitəsidir.
 
Uşaqların internet təhlükəsizliyi mövzusunda həm valideynlər, həm də uşaqlar düzgün istiqamətləndirilməlidir. Lakin xüsusilə qeyd etməliyik ki, bu sahədə ən böyük məsuliyyət valideynlərin, eyni zamanda internet xidməti provayderləri, təhsil qurumları və dövlətin üzərinə düşür.
 
İnternetdən təhlükəsiz istifadə hər bir fərdin həyatında əhəmiyyətli rol oynasa da, uşaqlar üçün bu təhlükəsizliyin daha vacib olması qaçılmaz reallıqdır. Uşaqların yaşlarına uyğun məlumatları rahat şəkildə əldə edə bilməsi, lakin zərərli kontentdən uzaq qalması üçün provayderlər tərəfindən təklif olunan informasiya süzgəcdən keçirilməlidir. Lakin iş bununla bitmir.
 
Məlumdur ki, uşaqlar yalnız evdə mövcud olan internetdən istifadə etmir. Bununla yanaşı, internet klublarda, məktəblərdə də internetə qoşulur və informasiya əldə edirlər. Dövlət tərəfindən həyata keçirilən layihə nəticəsində bir müddətdir ki, məktəblərdə filtrlənmiş internetdən istifadə olunur.
 
Lakin internet klublar haqqında bunu deyə bilmərik. Buna görə də uşaqların internet təhlükəsizliyinin təmin olunmasında atılacaq önəmli addımlardan biri də bu mövzunun nə qədər vacib olduğunu və onların zərərli kontentdən yayınmasını uşaqlara düzgün şəkildə çatdırmaqdır.
 
Məlumatda mərkəzin bu sahədə gördüyü işlər də öz əksini tapıb: “ETM 2013-cü ildə maarifləndirmə tədbirləri həyata keçirib, Azərbaycanda keçirilən beynəlxalq konfranslar çərçivəsində bu mövzuda müzakirələrə qatılıb, eyni zamanda ölkəmizdə uşaqların internet təhlükəsizliyinin təmin olunması üçün bir sıra təkliflər hazırlayıb”.
 
Bununla yanaşı, cari ildə də bu sahədə  tədbirlərin həyata keçirilməsi nəzərdə tutulur.
 
CAHANGİR
 



Baxış sayı: 733

© İstifadə edilərkən İctnews-a istinad olunmalıdır

Facebook Google Favorites.Live BobrDobr Delicious Twitter Propeller Diigo Yahoo Memori MoeMesto






28 Mart 2024

27 03 2024