TƏHLÜKƏSİZLİK

Tarix:02/09/14

Avropa İttifaqında kibercinayətkarlıqla mübarizə üçün yeni İT bölməsi yaradılıb

Avropa İttifaqının “Avropol” Polis Xidməti yeni çevik kiberqrupun yaradılmasını bəyan edib. “J-CAT” (Joint Cybercrime Action Taskforce) adlı qrupun vəzifəsi kibercinayətkarlıqla mübarizə və Avropa İttifaqının (Aİ) və digər ölkələrin fəaliyyətinin koordinasiyasının təşkili olacaq.

Altı ay ərzində işə başlayacaq qrup “Avropol”un yanında Kibercinayətkarlıqla Mübarizə Mərkəzinin (EC3 – European Cybercrime Centre) mənzil-qərargahında yerləşəcək. Bu barədə Avropa Komissiyasının məlumatında deyilir.

Bildirilir ki, “J-CAT” informasiya texnologiyaları (İT) sahəsində hazırkı təhdidlər ilə bağlı beynəlxalq təhqiqatların əlaqələndirilməsi, haker fəaliyyəti, o cümlədən “Troyan” proqram təminatı, “Botnet” və onlayn fırıldaqçılıq hallarının fəallığına aid vəziyyətin monitorinqi ilə məşğul olacaq. “NCA”-nın direktor müavini Endi Arçibaldın rəhbərlik edəcəyi “J-CAT” qrupuna digər qurumlarla yanaşı, ABŞ Federal Təhqiqatlar Bürosu (FTB), Böyük Britaniya Milli Kriminal Agentliyi (NCA), Kibercinayətkarlıqla Mübarizə Mərkəzi (EC3) və “EU Cybercrime Taskforce” qrupunun Avropa bölməsi daxildir, - "www.cybersecurity.ru” yazır.

Baxış sayı: 803