TƏHLÜKƏSİZLİK

Tarix:03/06/15

Hakerlər Yaponiya Pensiya Fondundan 1,25 milyon vətəndaşın fərdi məlumatını oğurlayıb

Yaponiya Dövlət Pensiya Fondunun kompüter sisteminə naməlum cinayətkarlar tərəfindən müdaxilə nəticəsində 1,25 milyon vətəndaşın fərdi məlumatı oğurlanıb. Oğurlanan informasiyaya təqaüdçülərin adları, identifikasiya nömrələri, təvəllüdü və ünvanları daxildir.

Mətbuat konfransı zamanı fond rəhbəri Toitiro Midzusima bildirib ki, sistemi yoluxduran virus fondun kompüterlərindən birində açılan elektron məktubda olub. T.Midzusimanın sözlərinə görə, hazırda insidentlə bağlı araşdırmalar aparılır və gələcəkdə belə halların baş verməməsi üçün lazımi tədbirlər görülür.

Yaponiya Pensiya Fondu müdaxilə nəticəsində məlumatları oğurlanan bütün şəxslərə yeni identifikasiya nömrələri vermək niyyətindədir.

Məlum olub ki, kiberhücum mayın 28-də həyata keçirilib. Hücumun kim tərəfindən törədilməsi hələ ki məlum deyil. Fond rəhbəri dəymiş maddi ziyanın həcmi və pensiya hesablarına qanunsuz müdaxilə hallarının sayı barədə məlumat verməyib, - "SecurityLab ” yazır.

Baxış sayı: 544