TƏHLÜKƏSİZLİK

Tarix:18/05/17

“WhatsApp” messencerinin saxta saytı reklam xarakterli proqram təminatı yayır

“Reddit” forumunun istifadəçiləri internetdə “WhatsApp” messencerinin saxta saytına (шhaтsapp.com) istinadın yayılması haqda məlumat veriblər. Sözügedən saxta sayt interfeysin yeni müxtəlif rəngli tərtibatını təklif edir, amma əslində reklam xarakterli proqram təminatı olan sayta yönləndirir.

“Ictnews” Elektron Xəbər Xidməti “securitylab.ru” saytına istinadən yazır ki, saxta saytın yaradıcıları “whatsapp.com” saytına maksimum oxşarlıq və istifadəçiləri çaşdırmaq üçün latın hərflərinə oxşar kiril simvollarından istifadə ediblər.

Yeni interfeys tərtibatı əldə etmək üçün istifadəçilərə sosial şəbəkələrdə dostlarla “шhaтsapp.com” istinadı ilə bölüşmək təklif edilir. Bundan sonra istifadəçinin bütün kontaktlarına yeni tərtibatı tərifləyən və saxta sayta istinaddan ibarət mesaj göndərilir.

Saxta sayta keçid edən istifadəçi “Chrome Web Store”də “WhatsApp” messencerində yeni tərtibat qurmaq adı altında “BlackWhats” genişlənməsinin səhifəsinə yönləndirilir. Səhifədəki informasiyaya əsasən, sözügedən genişlənməni 16 mindən çox istifadəçi yükləyib. Bu genişlənmənin 5 ballıq qiymətləndirmə sistemi üzrə 4 bal toplamasına baxmayaraq, yalnız üç istifadəçi rəy yazıb. Hazırda “BlackWhats” genişlənməsinin hər hansı zərərverici aktivliyi ilə bağlı məlumat yoxdur. “Google” şirkətinin mütəxəssisləri artıq “Chrome Web Store”dən sözügedən genişlənməni siliblər.

Emil Hüseynov

Baxış sayı: 366