TƏHLÜKƏSİZLİK

Tarix:13/12/17

Bu şirkətin noutbuklarında klaviatura casusu aşkar edilib

“HP Inc.” şirkətinin kompüterlərində yenidən casus funksionallığı aşkar edilib. Bu barədə informasiya təhlükəsizliyi üzrə müstəqil mütəxəssis Maykl Minq məlumat verib.

Mütəxəssis “SynTP.sys” adlı faylda keyloqerin mövcudluğunu aşkar edib. Kod klaviatura düyməsinə toxunuşlar haqda məlumatları yadda saxlayır.

“ICTnews” Elektron Xəbər Xidməti “dailycomm.ru” saytına istinadən yazır ki, keyloqer – bu, klaviaturanın klavişlərinə bütün toxunuşları qeydə alan proqramdır. Bu proqram, həmçinin parolları da qeydə alır. Bütün bu informasiya sərt diskdə jurnal faylına qeyd edilir və yazılır.

Bu funksionallıq “HP” noutbuklarında başlanğıc ayar kimi aktiv deyil. Lakin onun aktivləşdirilməsi sadə əməliyyat (Windows-un sistem reyestrinə iki açar daxil etmək) tələb edir və hakerlər zərərverici proqram təminatının köməyi ilə bunu məsafədən edə bilərlər. Sözügedən boşluq klaviaturanın düymələrinə istifadəçi toxunuşlarını izləməyə və fərdi məlumatları oğurlamağa imkan verir.

“HP Inc.” şirkətindən bildirilib ki, bu funksiya drayveri sazlamaq üçün hazırlanmışdı və son versiyada unudularaq saxlanılıb. Şirkət üzr istəyib və bu boşluğu aradan qaldıran proqram yeniləməsi çıxarmağa hazırlaşır.

Emil Hüseynov

Baxış sayı: 400