12px13px15px17px
Tarix:29/03/18

“Facebook” fərdi məlumatların idarəetməsi sistemində dəyişikliklər elan edib

“Facebook” sosial şəbəkəsində 50 milyon istifadəçinin fərdi məlumatının itkisi (bu, həm sosial şəbəkənin maliyyə vəziyyətinə, həm də Mark Zukerberqin nüfuzuna xələl gətirir) ilə əlaqədar davam edən qalmaqal fonunda sosial şəbəkənin nümayəndələri fərdi məlumatların idarəetmə sistemini istifadəçilər üçün daha aydın və əlçatan edəcək dəyişikliklər elan ediblər. Yeniliklərin təsviri “Facebook”un bloqunda dərc edilib.

“ICTnews” Elektron Xəbər Xidməti “hitech.newsru.ru” saytına istinadən yazır ki, ilk yenilik “Facebook”un mobil proqramında sosial şəbəkənin sazlamalarından ibarət bölmənin yenidən dizayn edilməsi ilə bağlıdır. Yenilənmiş versiya daha aydın olacaq və bütün sazlamalar bir yerdə əlçatan olacaq. Bundan başqa, yenilənmiş bölmə istifadəçilərə kənar proqramlara əlçatan olan informasiya haqda dəqiq məlumat əldə etməyə imkan verəcək.

Həmçinin proqramçılar “Privacy Shortcuts” adlı ayrıca menyu yaradıblar. Artıq istifadəçilər üçün öz hesabının məxfiliyini sazlamaq, dostlarla paylaşılan informasiyaya nəzarət etmək, “Facebook”da axtarış tarixçəsinə baxmaq və reklam nümayişini sazlamaq daha asan olacaq.

Nəhayət, “Facebook”a yüklənmiş bütün məlumatları asanlıqla yükləmək imkanı təqdim edilib.

Emil Hüseynov





Baxış sayı: 124

© İstifadə edilərkən İctnews-a istinad olunmalıdır

Facebook Google Favorites.Live BobrDobr Delicious Twitter Propeller Diigo Yahoo Memori MoeMesto






31 May 2020

30 05 2020