TƏHLÜKƏSİZLİK

Tarix:16/03/20

“Avropol” SİM kartları dəyişdirən cinayətkar qruplaşmanın üzvlərini həbs edib

“Avropol” yerli hüquq-mühafizə orqanlarının köməyi ilə bir neçə Avropa ölkəsində həbslər həyata keçirərək SİM kartların dəyişdirilməsi (SIM swapping) ilə məşğul olan cinayətkar qruplaşmaların fəaliyyətinin qarşısını alıb.

“ICTnews” Elektron Xəbər Xidməti “SecurityLab” resursuna istinadən yazır ki, “Quinientos Dusim” adlı əməliyyat zamanı “Avropol” yanında Kibercinayətkarlıqla Mübarizə Mərkəzi (EC3 – European Cybercrime Centre), İspaniya Milli Polisi və İspaniya Milli Qvardiyasının əməkdaşları tərəfindən ölkənin Benidorm, Qranada və Valyadolid şəhərlərində 12 şübhəli şəxs həbs edilib. Bundan başqa, “Smart Cash” əməliyyatı çərçivəsində Rumıniya və Avstriya hüquq-mühafizə orqanlarının əməkdaşları tərəfindən daha bir kibercinayətkar qruplaşmasının 14 şübhəli üzvü saxlanılıb.

Bildirilir ki, birinci qruplaşmanın üzvləri kiberhücumlar seriyası nəticəsində 3 milyon avronun oğurlanmasında şübhəli bilinirlər. Zərərli proqram təminatı vasitəsilə cinayətkarlar onlayn bankçılıq üçün istifadəçi məlumatlarını oğurladıqdan sonra qurbanlara məxsus SİM kartın bərpası üçün telekommunikasiya operatorlarına saxta şəxsiyyət vəsiqəsi təqdim etməklə onlara müraciət ediblər. SİM kartın surətini əldə edən cinayətkarlar ikifaktorlu autentifikasiya üçün yoxlama kodlarını ələ keçirərək pul vəsaitlərini başqalarının bank hesablarından saxta hesablara köçürüblər.

Məlumata görə, Rumıniya və Avstriyada həyata keçirilən əməliyyatlar zamanı kibercinayətkarlar tərəfindən oxşar sxemdən istifadə edilib. Onlar eyni sxemi tətbiq etməklə “SIM swapping” vasitəsilə təhlükəsizlik kodlarını ələ keçiriblər. Lakin pul vəsaitlərinin nağdlaşdırılması kartsız bankomatların köməyi ilə həyata keçirilib.

Nəticədə 100-dən çox şəxs qruplaşmanın qurbanı olub. Cinayətkarların etdiyi hər əməliyyat zamanı təxminən 6-137 min avro oğurlanıb. Oğurlanan vəsaitlərin ümumi məbləği isə yarım milyon avro təşkil edir.

Nizam Nuriyev

Baxış sayı: 595