GÖRÜŞLƏR

Tarix:26/11/11

ABŞ İKT sektorunda Azərbaycanı dəstəkləyir

Rabitə və informasiya texnologiyaları naziri Əli Abbasov ABŞ-ın Havay ştatının nümayəndələr Palatasının üzvü, xanım Rida Kabanilla ilə görüşmüşdür.

Görüşdə Azərbaycanda informasiya kommunikasiya texnologiyaları (İKT) sektorunda həyata keçirilən işlər, o cümlədən, “Elektron-hökumət” proqramı, Regional İnnovasiya Zonaları layihəsi, kosmik sənayenin yaradılması və ilk telekommunikasiya peykinin orbitə buraxılması istiqamətində həyata keçirilən işlər barədə geniş məlumat verilmiş, İKT sahəsində qarşılıqlı təcrübə mübadiləsi, investisiyaların cəlb edilməsi kimi məsələlər müzakirə mövzusu olmuşdur.

Amerika Birləşmiş Ştatları ilə Azərbaycan arasında bütün sahələrdə sıx əməkdaşlıq əlaqələrinin olduğunu bildirən nazir Əli Abbasov qeyd etmişdir ki, Azərbaycanla Amerika həm də strateji tərəfdaşdır.

Nazir, son illər bu tərəfdaşlıq əlaqələrinin Azərbaycanda informasiya kommunikasiya texnologiyaları sektorunun inkişafı fonunda daha da genişləndiyini bildirmişdir. İKT sektorunda ABŞ-la sıx əməkdaşlıq əlaqələrinin mövcudluğunu vurğulayan nazir, bu ölkənin İT sahəsində fəaliyyət göstərən ən nüfuzlu şirkətlərinin Azərbaycanda ofislərinin olduğunu və yerli layihələrdə aktiv şəkildə iştirak etdiyini qeyd etmişdir.

Ə. Abbasov Azərbaycan üçün böyük əhəmiyyət kəsb edən kosmik sənayenin yaradılması istiqamətində Amerika təcrübəsinin mənimsənilməsinin, ABŞ-ın “Orbital Sciences” şirkəti ilə birbaşa əməkdaşlığın böyük əhəmiyyət kəsb etdiyini qeyd etmişdir.

Nazir İKT sahəsində əlaqələrin genişləndirilməsi və yeni əməkdaşlıq imkanlarının müəyyənləşdirilməsinin qarşılıqlı əlaqələrin inkişafı baxımından faydalı olacağını vurğulamışdır.

Xanım Rida Kabanilla “Bakutel-2011” sərgi-konfransı çərçivəsində Azərbaycanda İKT sektorunda həyata keçirilən işlərlə yaxından tanış olduğunu və sektor üzrə əldə olunan nəticələri yüksək qiymətləndirdiyini diqqətə çatdırmışdır.

R.Kabanilla informasiya texnologiyaları və kommunikasiya xidmətləri sahələrində hökumət və ticari əlaqələri gücləndirmək niyyətini dəstəkləmişdir. O, təcrübə mübadiləsi üçün hökumət, qeyri-hökumət, özəl sektor və elmi cəmiyyət təmsilçilərinin əməkdaşlığa cəlb olunmasının sektor üzrə əldə olunan nəticələrə müsbət təsir edəcəyini bildirmişdir.

Baxış sayı: 1174